top of page

A Consellería de Cultura aposta pola coreógrafa Kirenia Martínez como nova directora do festival Escenas do Cambio do Gaiás


A Consellería de Cultura vén de designar á coreógrafa e mediadora cultural Kirenia Martínez (Cuba, 1980) como nova directora artística de Escenas do cambio, o festival de teatro, danza e arte en acción que ten lugar na Cidade da Cultura e que o próximo ano celebrará a súa décima edición.

Con máis de 20 anos de experiencia —19 deles a residir en Galicia— e unha longa traxectoria artística, a tamén bailarina e fundadora de Kirenia Danza substitúe a Lola Correa, á quen a Consellería de Cultura agradece a súa importante labor á fronte de Escenas do cambio.

Ao longo das súas tres edicións como directora artística -tomando o relevo a Pablo Fidalgo, primeiro director de Escenas do cambio-, Correa destacou pola aposta pola escena contemporánea galega, por fomentar a creación co estreo de pezas producidas ad hoc para o festival e pola comprensión da arquitectura do Gaiás, con fermosas propostas itinerantes deseñadas pensando en aproveitar todas as posibilidades dos singulares espazos da Cidade da Cultura.


Bailarina e coreógrafa


Kirenia Martínez é unha bailarina, coreógrafa e mediadora cultural nacida en Cuba que conta cunha extensa traxectoria en varios países. As súas creacións foron presentadas en Cuba, Bélxica, Suecia, Alemaña, Brasil, Luxemburgo, Francia, Italia, Brasil ou Inglaterra. Actualmente, ademais do desenvolvemento das súas compañías en Galicia, segue colaborando en varios proxectos de investigación coreográfica, literaria e audiovisual con entidades de recoñecido prestixio.

Posúe o título de Nivel Medio Superior de Educación Técnica Profesional, na especialidade de Actuación, pola Escola Nacional de Arte de Cuba (2000) e o título de 1º Nivel de Bailarina de Danza Contemporánea polo Ministerio de Cultura de Cuba (2001).

É directora da Compañía Kirenia Danza desde o 2019 e codirectora da Compañía Entremáns dende 2005. A nova responsable artística de Escenas do Cambio tamén exerce de codirectora do festival Quincegotas de A Coruña e dirixe o festival Danzar o Camiño dende o 2021, ademais de coordinar o proxecto de Mediación Cultural do Teatro Rosalía de Castro (2023).

Comments


bottom of page