A compañía Kirenia Danza presenta Afectos, a terceira entrega da súa triloxía coreográfica Os vulnerables. Esta triada de producións enfócase no impacto da pandemia da COVID-19 nas persoas migrantes e na súa rede de afectos. A compañía demostrou o seu compromiso con este tema ao longo de dúas producións previas: E-migrantas en 2020 e Primeiro a vida! en 2021, que abordaron a necesidade dun cambio no modelo actual de xestión das crises sociais. Nos últimos anos, a pandemia puxo de manifesto a importancia de protexer os dereitos fundamentais das persoas migrantes e desprazadas, sexa por motivos económicos, crisis climáticas, persecucións por motivos políticos, étnicos ou de tendencia sexual, conflitos ou outras causas. Moitas persoas, incluídas as artistas de danza, vironse afectadas durante a crise da COVID-19 e precisaron axuda.

A obra Afectos sitúanos diante dunha reflexión alegórica do patrimonio humano da migración, como son o Camiño de Santiago en Galicia, o Kumano Kodo en Xapón, os corredores humanitarios de Ucraína ou as novas rutas de emigración centroamericana. Afectos é unha homenaxe á complexidade das emocións humanas e unha invitación a conectarnos co noso propio ser emocional. Un convite ás audiencias a reflexionar sobre a importancia da solidariedade en tempos difíciles.